Author: EOE

Dimenjada dels amics de l’EOE del 17 al 19 de febrièr de 2023, a Girona : visca l’amistat occitano-catalana !

Las doas primièras dimenjadas dels amics de l’EOE se debanèron a Tolosa : aisit, aviam la Topina e l’Ostal d’Occitania per nos remosar, de mond de la còla occitana i demoravan o èran pròches. Los nòstres amics catalans faguèron lo viatge per nos i retrobar, visitar la vila, jogar, cantar e dançar aprèp d’amassadas a l’entorn de las activitats de l’EOE.

Alavetz, la còla de l’EOE decidiguèt de se raprochar de Catalonha e organizèt la tresena dimenjada [en 2022] al Clapàs. Aisit, la Maud i demòra, l’Aliça e lo Vincenç tanben, e Lo Barricade, luòc associatiu dels bèls nos aculhiguèt per de seradas e de charradissas que l’EOE es costumièra. Los catalans se mostrèron totjorn presents, e encara mai qu’abans : pendent la dimenjada, de segur, amb una visita en catalan pel Josep, mas tanben dins l’organizacion de las activitats de l’EOE seguenta : lo talhièr abitual de catalan de Meritxell, mas tanben de novèls amb las danças dels bastons de la Laura e lo talhièr d’audiovisual del Fede.

La quatrena dimenjada [2023], coma una evidéncia per totes, se deviá far en Catalonha ! Mens aisit… Mas la Laura, la nòstra catalana dançaira de bastons, prenguèt lenga amb lo Marc de l’Atenèu Salvadora Catá de Girona e una aventura novèla e emplenada de riquesas e d’encontres nos i esperèt.

Foguèrem un quarantenat d’amics de l’EOE entre lo divendres e lo dimenge, a nos reünir dins aquela vila magnifica que visitèrem mercés al nòstre guidaire catalan e amic de l’EOE, lo Fede, e Marius, cosinièr e engatjat de l’Atenèu.

Pau de l’Atenèu nos faguèt visitar lo musèu del cinèma de Girona ont trabalha : una meravilha !

Aquela quatrena dimenjada dels amics de l’EOE foguèt l’escasença d’encontres novèls, d’unes extraordinaris, d’autres emplenats d’emocions, e nos permetrà un còp mai, de far parlar de la nòstra associacion, de las nòstras lenga e cultura occitanas, ligadas pel còr a sas bessonas catalanas. De segur sortiguèrem de la dimenjada fatigats de tan marchar e dançar, mas lo còr plen de vam e d’envejas de ligar las aventuras de l’EOE a las de l’Atenèu, a las de la corala feminista, e, un sòmi, d’anar mai luènh duscas a las valadas occitanas d’Itàlia !

Un còp de mai, l’Escòla Occitana d’Estiu se debanèt a Vilanèva d’Òlt, del dimenge 14 al dissabte 20 d’agost 2022, èra la 48ena edicion.

Los estagiaris èran al rendètz-vos e foguèran mai de 130 a s’i trapar, per parlar, escambiar e apréner la lenga pendent una setmana. Ongan, la participacion èra la mai nauta dempuèi d’annadas. L’intergeneracionalitat es una de las fòrças de l’EOE e aquela edicion èra plan dins la dralha abituala : gaireben un quart dels estagiaris de mens de 25 ans, 60% de 25 a 60ans, 22% de mai de 6O ans. E nos cal joslinhar la preséncia de 20 enfants a l’escoleta!

L’interdialectalitat es tanben importanta. Se avèm una majoritat de lengadocians, ongan un quarantenat de personas participèran als corses de gascon e de lemosin, e lo talhièr de catalan foguèt tanben plan emplenat. 

En mai del talhièr de catalan, los estagiaris poguèran seguir los talhièrs de toponimia, de creacion audiovisuala, de bal de bastons catalans, de fabricacion d’instuments, de dança, de cant eca. Mention especiala al grop del bal de bastons, que aprèp una setmana de cors, presentèran una coregrafia fòrça polida al concert de divendres sus la plaça de Vilanèva!

L’empont dubèrt foguèt tanben una capitada. Entre teatre, cant e poesia, lo mond que volian se podian exprimir lors talents artistics sus la terrassa davant lo public de l’estanquet. En mai de l’empont dubèrt, l’estanquet prepausava cada ser un baleti fins a tard dins la nuèit. Auqesta annada èra animat per Maud, del grop Barrut (entre autres) e Joaquim, del grop Man Encantada que joguèt divendres sus l’empont bel a Vilanèva d’Òlt. Los estagiaris qu’èran musicians èran tanben planvenguts per sortir lors instruments e far dançar lo mond.

Lo dimècres, los participants podian causir entre tres activitats: una visita de Puègmiròl, una visita al musèu del fetge gras de Frespèch, o un jòc sus las urgéncias climaticas e linguisticas. Èra l’escasença de sortir dels bastiments de l’escòla e de descobrir o tornar descobrir la region avans lo baleti del sèr  amb Anem Duo.

Aquesta edicion foguèt una capitada e vos mercejam totes, benevòls coma estagiaris, d’aver participat a l’EOE 2022!

A l’an que ven del 13 al 19 d’agost 2023!

signal-2021-08-23-110415_001

Per la serada dels estagiaris, lo talhièr de cant cantèt "Castels en l'aire" de Godolin amb una musica de Pèire Boissièra

signal-2021-08-23-110415_007

Moment cantat sus la terrassa de l'Estanquet

signal-2021-08-23-110415_003

Presentacion del film "Far viure la lenga" de Patrick La Vau, rodat en 2021 a l'EOE

signal-2021-08-23-110415_010

Festa occitano-catalana a Vilanuèva d'Olt, concert del grop Man Encantada

Tornada ongan al licèu l’Ostal, l’Escòla Occitana d’Estiu acampèt amoroses de la lenga e de la cultura occitanas del dimenge 15 al dissabte 21 d’agost.

Dempuèi d’annadas cada novèla edicion de l’EOE pareissiá una escasuda. Aquesta annada escapa pas a la règla.

La fòrta frequentacion del 47en estagi e lo bon ambient entre los participants i es segurament per quicòm. Los 120 estagiaris joves o vièlhs poguèron pendent tota la setmana viure en occitan del matin al ser.

Venguts per melhorar lor nivèl o per préner pè dins l’occitan, poguèron comptar sus l’acompanhament dels professors benevòls.

En mai dels corses e de las conferéncias, los talhièrs e los rescontres permetèron de crear de ligams entre los novèls e los abituats. Lo banh intercultural èra enfortit per la preséncia d’estagiaris venguts de pertot: venent de Catalonha,  d’Espanha, d’Occitània, de Guadalope o d’Alemanha, cadun a profitat de la setmana per viure dins una botiòla occitanofòna. Los dialèctes s’entremesclavan a l’Estanquet al moment del café, de l’aperitiu o del balèti animat cada ser pel grop Licotissa. Ongan,  l’Estanquet s’es mudat dins una sala mai bèla. Atal lo monde a pogut dançar e s’abeurar en mèma temps. La granda noveltat èra tamben la terrassa,  que porgiguèt un espaci suplementari de convivialitat e e permetèt d’ofrir un empont dubèrt a totes los que desiravan s’exprimir artisticament en public (fòto 2). Dança, cant e musica animèron cada moment de la setmana,  pendent los talhièrs,  sus l’empont dubèrt o d’un biais espontanèu, tot al long de la jornada e de la serada.

Las doas visitas prepausadas lo dimècres (la bòrda Lo Cornal a Sant Pèire de Clairac e lo centre istoric de Vilanuèva d’Òut amb Frederic Fijac) permetèron als estagiaris de descobrir o tornar descobrir lo ròdol de l’Ostal.

Grand mercés a totes d’aver ajudat a far d’aquesta edicion 2021 una capitada !

signal-2021-08-23-110415_001

Lo ser aprèp lo Balèti, jòc de cartas en occitan sus la terrassa de l'Estanquet

signal-2021-08-23-110415_007

Passejada dins lo centre istoric de Vilanuèva d'Òut amb Frederic Fijac

signal-2021-08-23-110415_003

Conferéncia de presentacion de la revista Lo Diari per Danís Chapduèlh

signal-2021-08-23-110415_010

L'empont dubèrt, sus la novèla terrassa de l'Estanquet

Venètz recuperar una letra d’amor escrita per un autentic trobador (de l’Edat Mejana o del segle 21) per la mandar la persona de vòstre còr.

Letras creadas al talhièr de creacion poetica de genièr a Tolosa.

Un eveniment organizat los amics de l’Escòla Occitana d’Estiu, ÒsCa Tolosa, la seccion Occitan de l’Ut2J e lo CREO Tolosa 

Un talhièr de creacion poetica a partir d’una garba amorosa trobadoresca. L’enjòc es lo seguent : Crear de letras d’amor a afichar lo jorn de la Sent Valentin, a Tolosa.

PROGRAMA
Dissabte 23/01 : lo matin talhièr de creacion poetica. Lo vèspre : talhièr de calligrafia. Animat per Pascau Sebat.
Dimenge 24/01 : “talhièr de las petitas mans”. Objectiu : completar la colleccion de letras d’amor per tal d’arribar a 500 letras per afichar sul Capitòli.

Podètz sostenir aquel projècte qu’a besonh d’un còp de man per sa primièra edicion aicí. Las contribucions balhan dret a un recebut fiscal que permet de las dedusir dels impòstes.

NB : Inscripcion pel talhièr obligatòria (nombre limitat) : sentvalentinoccitana@mailo.com

Eveniment organizat per l’Escòla Occitana d’Estiu, ÒsCa, la seccion occitan de l’universitat Joan Jaurès e lo CREO Tolosa