Festenal de lenga e cultura occitanas en Òut e Garòna, cada annada al mes d’octobre : concerts, bals, estagis, conferéncias, projeccions, exposicions, animacions pels escolans bilingües, …
La Quinzena occitana 2024 se tenguèt dins mantuna vila e vilatges d’Òut e Garòna del 4 al 20 d’octobre. Festenal a l’entorn de la lenga e la cultura occitanas, co-pensat e co-bastit per 7 associacions del 47 amb lo servici cultura del departament. L’EOE-IEO 47 es una de las associacions del Collectiu Quinzena occitana.
Cada annada, una tematica es causida per ligar totas las animacions prepausadas, ongan lo jòc èra metut en avant amb la tematica « Jogar ». Un fum d’activitats : jornada de jòcs a destinacion dels escolans, mòstra, espectacles musicals, balètis, projeccions documentaris, passejada, jòc de pista per las familhas, forum de jòcs (tradicionals e de societat), estagi de cants, autras animacions escolaras… e de pertot : Pena d’Agenés, La Capèla Bironç, Viraselh, Marmanda, Castèthgelòs, Preishàs, Barbasata, Boèr.
Ongan l’EOE-IEO 47 participèt a las jornadas organizadas collectivament, jornada jòcs a destinacion dels escolans de Pena e Forum jòcs a Boèr. Organizèt lo passatge de 9 classas de l’escòla (bilingüas e non-bilingüas) e 2 classas del collègi de Pena, sus la jornada, sus diferents jòcs XXL, de societat, e lor organizacion. Metèt a dispausicion dels dròlles sos jòcs de palets, quilhas e de societat occitans.
Creèt e animèt tanben un jòc de pista a destinacion de las familhas « Dins las piadas occitanas » a Pena d’Agenés ont 8 familhas e un grop de dròlles d’un centre de léser participèron. Animacion plan complimentada, totas las familhas foguèron ganhantas, amb caduna un magnet occitan + una pasta a tartinar al chocolat locala !
La Quinzena s’acabèt a Boèr sus una jornada Forum de jòcs a destinacion de tot public. Mai d’un cinquantenat de jòcs XXL, esportius, de societat… expausats, lo public podiá practicar cada jòc, amb per cadun una sensibilizacion a la lenga. Un bon vin 2024 !