Coneissètz La Passem? Es un relai pedèstre sul territòri ont l’occitan es parlat. Una corsa inspirada de la Korrika basca e de la Redadeg bretona.
Per l’edicion 2026, lo percors anava de Bedós a Anglet, e passava, pel primièr còp, per Òlt-e-Garona e Gironda : un brave torn dins tot l’espaci gascon. L’idèa venguèt doncas a d’un.a.s d’organizar la dimenjada dels amics de l’EOE dins l’encastre de La Passem. En Òlt-e-Garona? Non, perqué organizar una « dimenjada » un dimècres (lo 6 de mai), es pas çò mai simple… La causida se portèt alavetz sus l’arribada de La Passem, prevista lo 9 de mai a Anglet. Un vintenat de participants se marquèron per aquela dimenjada dels amics de l’EOE a Baiona/Anglet. Rendètz-vos èra donat a l’Acadèmia Gascona de Baiona, dins lo barri Sent Esperit (Sent Esperit deu Cap deu Pont, anciana comuna occitana de Gasconha, anexada a Baiona ambe l’arribada del trin), per una visita guidada de la vila de Baiona en gascon.
Mercés a Vincenç Claverie de nos aver guidat dins la passejada capvath Sent Esperit, lo gran e lo petit Baiona : descobriguèrem la vila, la senhaletica trilingüa de Baiona (francés, basco e gascon), e de traças de l’occitan-gascon dins Baiona (una ostalariá « Le Loustal », un optician «Orbe», eca). Acabèrem aquela visita dins lo petit Baiona, qu’èra animat per la fèsta del Pintxo Eguna. Al ser, sopèrem dins una pomadariá ont vegèrem aquel biais tradicional de servir lo pomat basco. La serada s’acabèt en cançons.
La jornada del dissabte èra consacrada a La Passem, o quasi. Nos retrobèrem per un repais partejat sus una plaja d’Anglet (en omenatge a la dimenjada de 2025 a Nissa) ont d’un.a.s preparèron los camisets per la fin de la correguda. Puèi, la vesprada avançant, foguèt temps de jónher los darrièrs quilomètres de La Passem : mai o mens de quilomètres segon l’energia de cadun.a. A l’abans-darrièr quilomètre (crompat per l’EOE), retrobèrem los amics de Carrièras Occitanas qu’avián menat l’ostal de Joan Petit (https://www.jornalet.com/nova/23780/vilafranca-de-roergue-capita-ben-la-manifestacion-per-la-lenga-e-l’identitat-occitanas).
Tots amassas, correguèrem los darrièrs quilomètres, o puslèu caminèrem sus los darrièrs quilomètres, qu’entre l’Ostal de Joan Petit, los correires, los chancaires, eca, i aviá de monde. Un pauc de cançons tanben per se donar d’energia : « Pichon pachon… la Passem !» (https://lapassem.com/la-passem-en-musique/ ).
A l’arribada, Dany Madier-Dauba, la mairina d’aicesta edicion de La Passem legiguèt lo messatge del ligam de La Passem 2026 (cf https://lapassem.com/ligams-edicion-la-passem-2026/). L’escasença per anonciar que Dany animarà lo bal del dimècres a l’EOE 2026 ambe lo duò Tastets.
Puèi foguèt temps d’anar a la serada de fin de La Passem : una serada polida ont poguèrem escotar de musica plasenta, dançar, mas tanben retrobar los amics de las autras associacions occitanas.
Lo dimenge, la nòstra dimenjada dels amics de l’EOE èra ja a s’acabar. Un darrièr repais amassas per aqueles que podián, e foguèt ja l’ora de nos dire : a lèu lèu a l’EOE 2026 !
La tribuna d’Eric Astié sus La Passem : https://www.jornalet.com/opinion/24468/curioser-correr-per-una-lenga