Per festejar los cinquanta ans de l’EOE, decidiguèrem de fargar un objècte simbolic e artesanal, per que los estagiaris pòscan tornar a l’ostal amb un bocin d’EOE.
L’idèa èra d’utilizar las competéncias creativas de l’equipa, coma la serigrafia, qu’aviam aprés als Escambis Occitans de la Davalada en 2022.
Comencèrem per soscar al design d’afichas anniversaris, e l’idèa de serigrafiar de sacas en teissut es nascuda. Nos demorava del teissut dels lençòls utilizats pels desguisaments de candèlas qu’aviam preparats pel Carnaval de Pau : nòstra costurièra en cap los tintèt en blau e passèt mai d’una serada a cóser tot aquò per ne far de polidas sacas.
Nos retrobèrem per passar una dimenjada de serigrafia intensa. Nòstras temptativas d’afichas, a causa de la calor que fasiá secar la tinta tròp lèu, foguèron pas pro bonas per prepausar las resultas a l’estagi.
Coma res se pèrd pas, adaptèrem l’imatge prevista per ne far d’écocups d’anniversari.
Mas la serigrafia dels sacs foguèt una bona capitada ! N’en faguèrem un bon centenat, dins un talhièr improvisat. E aprèp, escriguèrem puèi nosèrem d’etiquetas de papièr, amb de fils reciclats.
100% reciclat, 100% artesanal, 100% fait a l’ostal !
A l’Escòla Occitana 2024, las sacas, renomenadas «Trigossacs», foguèron prepausadas a la venda a la librarià, e faguèron una polida decoracion per las parets. Foguèt un succès incresible, e los 100 foguèron venduts abans la fin de la setmana !
Ara cada proprietari d’aquesta saca porta qualques mots d’occitan dins l’espai public…
