Novèla creacion reciclada exclusiva per l’Escòla Occitana d’Estiu
Après lo trigossac dels 50 ans, l’equipa creativa de l’EOE a agut una idèa novèla per prepausar un quicòm que permeta de difusar l’occitan dins lo quotidian dels estagiaris en defòra del licèu l’Oustal : un mocador de còl.
Qué pus mielhs per lo decorar qu’un tèma qu’es vengut dempuèi qualques annadas una obsession gustativa per las estanquetaires : l’alhòli !
Ja mencionat dins lo desfís n°52 prepausat en 2024 sus las rets de l’EOE, l’idèa èra de difusar aquel amor alhadís incondicional a çò pus mai de personas.
Coma totjorn, l’objectiu es pas de crompar d’objèctes totes faits, mas de cercar cossí reütilizar de matèria primièra e nòstra creativitat per ne far d’objèctes unics.
Amb de lençòls vièlhs (dont d’unes datavan de l’operacion costumes pel Carnaval de Pau), nòstra costurièra en cap tintèt lo teissut, e cosèt triangles e traingles oradas de temps.
Nòstra dessenhaira escriguèt a man la recèpta e l’escanerizèt per la poder modificar e ne far un dessenh utilizable per la serigrafia.
Qualquas proposicions mai tard, tombèrem d’acòrdi sul dessenh final. Los autres servirián per las etiquetas.
L’etapa seguenta, l’impression serigrafica, se faguèt dins los Pirenèus per beneficiar d’un climat mens caud e permetre a la tinta serigrafica de secar pas tròp lèu suls ecrans.
En parallèle, las etiquetas foguèron preparadas amb una bobina de còrda reciclada provenent de fial vièlh dels paquets de la Pòsta.
Es a la debuta de l’EOE que los membres de l’equipa creativa poguèron amassar mocadors e etiquetas abans de los penjar dins la librariá ont foguèron prepausats a la crompa tota la setmana.
100% reciclat, 100% artesanal, 100% fait a man !
L’argent de la venda anèt dirèctament a l’associacion per l’ajudar a organizar d’activitats a l’entorn de l’occitan.
Los 70 exemplars son partits coma de panatons !