Novèla creacion reciclada exclusiva per l’Escòla Occitana d’Estiu
Après lo trigossac dels 50 ans, l’equipa creativa de l’EOE aguèt una idèa novèla per prepausar un quicòm que permet de difusar l’occitan dins lo quotidian dels estagiaris en defòra del licèu l’Oustal : un mocador de còl.
Qué de melhor per o decorar qu’un subjècte qu’es vengut dempuèi qualques annadas una obsession gustativa per las estanquetaires : l’alhòli.
Ja mencionat dins lo desfís n°52 prepausat en 2024 sus las rets de l’EOE, l’idèa èra de difusar aquel amor incondicional per l’alh a un maximum de personas.
Coma totjorn, l’objectiu es pas de crompar d’objèctes tot faches, mas de cercar coma reütilizar de matèria primièra e nòstra creativitat per ne far d’objèctes unics.
Amb de vièlhs lençòls (dont d’unes datavan de l’operacion costumas pel Carnaval de Pau), nòstra costurièra en cap tintèt lo teissut, e cosèt triangles pendent d’oras.
Nòstra dessenhaira a escrich a man la recèpta per puèi l’escanerizar e la modificar per tal de ne far un dessenh utilizable per la serigrafia. Qualquas proposicions mai tard, sèm tombadas d’acòrdi sul dessenh final. Los autres serviràn per las etiquetas.
L’etapa seguenta, l’impression serigrafica, se faguèt en montanha per beneficiar d’un climat mens caud e permetre a la tinta serigrafica de secar pas tròp lèu suls ecrans.
En parallèl, las etiquetas son estadas preparadas amb una bobina de còrda reciclada provenent de vièlh fial de paquet de la Pòsta.
Es a la debuta de l’EOE que los membres de l’equipa creativa an pogut amassar mocadors e etiquetas abans de los penjar dins la librariá ont son estats prepausats a la crompa tota la setmana.
100% reciclat, 100% artisanal, 100% fach a la man !
L’argent de la venda es anat dirèctament a l’associacion per l’ajudar a organizar d’activitats a l’entorn de l’occitan.
Los 70 exemplars son partits coma de pans pichons !