Qual sèm?

L’Escòla Occitana d’Estiu (EOE – IEO 47)  es una associacion qu’òbra en favor de la promocion e de la valorizacion de la lenga e de la cultura occitanas, a travèrs eveniments divèrses tot al long de l’annada. Lo mai emblematic d’entre eles es l’Escòla Occitana d’Estiu. La 47na edicion se debanarà en agost de 2021.

Nòstra tòca : l’Occitan a la portada de totas e totes, e per totas e totes !

Activitats prepausadas per l’associacion

L’Escòla Occitana d’Estiu, una setmana cada annada al mes d’agost, del 15 al 21 d’agost en 2021 a Vilanuèva d’Òlt (47).
Estagi d’aprendissatge, de perfeccionament e de practica de la lenga occitana per totes (adultes, jovents e mainatges). Quin que siá vòstre nivèl, poiretz seguir de corses de lenga, jos fòrma intensiva (6h/jorn) o semi-intensiva (2h/jorn). Aqueles corses son donats dins 3 dialèctes (gascon, lengadocian, lemosin) e 3 nivèls (A, B e C).

Se causissètz la formula semi-intensiva, auretz la possibilitat de seguir un talhièr cultural dins la vesprada, que vos permetrà d’un biais ludic de contunhar a vos apropriar la lenga. A la fin de la vesprada, son prepausadas una causida de conferéncias sus tèmas divèrses (istòria, actualitat, literatura, …). Per la serada, vos convidarem a descobrir la creacion artistica occitana a travèrs concèrt, balèti, teatre, contes, …

Venètz en familha ! Es tanben un estagi pels mainatges e jovents que desiran viure una setmana en occitan. Los animators prepausan un programa, en immersion linguistica, amb d’activitats manualas, artisticas, ludicas e esportivas … Informacions

Escambis Occitans : per contunhar de far viure la lenga !

Los EOP (Escambis Occitans de Prima) a Colonha (32).

A causa de las restriccions governamentalas qu’an per tòca de luchar contra la propagacion del COVID-19, los Escambis Occitans de Prima son reportats a la Davalada los 26, 27 e 28 d’octòbre de 2021.

Los actors qu’òbran pel desvolopament de l’ensenhament o de la cultura occitana son nombroses mas pòdon rencontrar de dificultats ligadas al temps o a la geografia per se conéisser entre eles. Aqueles rencontres prepausan de prene lo temps d’escambiar entre los diferents partenaris e d’enriquesir las practicas de cadun a partir de las volontats/possibilitats de totes. Nòstre desiri es que d’aqueles escambis nascan d’aisinas e de projèctes que valorizaràn e facilitaràn las practicas de totes.

Animacions de sensibilizacion e de descoberta de la lenga

Lo 14 de fèbrier tanben … Parla-me Occitan, m’agrada ! <3
Per una Sent Valentin en occitan per totes e gratuita !

La tòca es de rendre l’occitan present coma mejan d’expression de l’amor lo jorn de la Sent Valentin a travèrs un afichatge de passages poetics que los passants seràn convidats a emportar e a ofrir.
Dimenge 14 de febrièr de 2021 a Tolosa.
Informacions

Talhièr de cosina en occitan, del 15 al 17 de febrièr de 2021 a Tolosa (31). Cosinar amb de professionals un repais en occitan ! Lo plaser de partatjar la gormandisa linguistica, d’aprene e de participar a cosinar un repais que la lenga ne serà lo fricòt mai delicat.

– Aquel eveniment foguèt anullat a causa de la crisi sanitària) –

Passejadas contadas en occitan, conferéncias, … dins lo cadre del festenal Quinzena occitana dins Òlt-e-Garona (en 2021, al mes d’octòbre)
Informacions

Corses per adultes a Agen (47) a l’annada : existís mila e una bonas rasons d’aprene l’occitan… mas una sola basta ! Los aprenents venon per rasons diferentas : ajudar son mainatge escolarizat dins una escòla bilingua o immersiva, trobar un emplec ligat a l’occitan, connéisser mai la cultura de son païs, sas rasigas, comprene las originas dels noms de luòc, de familha, las paraulas dels artistes occitans e mai que mai lo PLASER ! Lo plaser d’aprene una lenga : cants, literatura, tradicion populara, provèrbis, istòria…

· Animacions escolaras e extra-escolaras : sensibilizacion a la lenga gràcias a de talhièrs (fabricacion d’instruments de musica, jòcs de quilhas & palets, jòcs de societat en occitan, …).

· Formacion especifica :
– « Aquesir e desvolopar de competéncias e d’aisinas d’animacion en lenga e cultura occitanas », al torn d’una tematica (carnaval occitan, video, …) o al torn de moduls (contes, danças, cants, jornalisme, …).
– Estagi de cant tradicional occitan.

Per mai d’informacions, nos podem contactar sus eoe@wanadoo.fr o via nòstra pagina Facebook.