L’ Escòla Occitana d’Estiu (EOE – IEO 47) es una associacion qu’òbra en favor de la promocion e de la valorizacion de la lenga e de la cultura occitanas, a travèrs eveniments divèrses tot al long de l’annada. Lo mai emblematic d’entre eles es l’Escòla Occitana d’Estiu.
Nòstra tòca : l’Occitan a la portada de totas e totes, e per totas e totes !
Activitats prepausadas per l’associacion
L’Escòla Occitana d’Estiu, una setmana cada annada al mes d’agost a Vilanuèva d’Òut (47) en imersion lingüistica.
Estagi d’aprendissatge, de perfeccionament e de practica de la lenga occitana per totes (adultes, jovents e mainatges). Quin que siá vòstre nivèl, poiretz seguir de corses de lenga, jos fòrma intensiva (6h/jorn) o semi-intensiva (2h/jorn). Aqueles corses son donats dins 4 dialèctes (gascon, lengadocian, lemosin e provençal) e 3 nivèls (A, B e C).
Se causissètz la formula semi-intensiva, auretz la possibilitat de seguir un talhièr cultural dins la vesprada, que vos permetrà d’un biais ludic de contunhar a vos apropriar la lenga. A la fin de la vesprada, son prepausadas una causida de conferéncias sus tèmas divèrses (istòria, actualitat, literatura, …). Per la serada, vos convidarem a descobrir la creacion artistica occitana a travèrs concèrt, balèti, teatre, contes, …
Venètz en familha ! Es tanben un estagi pels mainatges e jovents que desiran viure una setmana en occitan. Los animators prepausan un programa, en immersion linguistica, amb d’activitats manualas, artisticas, ludicas e esportivas … Informacions
Escambis Occitans : per contunhar de far viure la lenga !
Los EOD (Escambis Occitans de la Davalada) a Colonha (32) se faguèron en 2021, 2022 e 2023.
Los actors qu’òbran pel desvolopament de l’ensenhament o de la cultura occitana son nombroses mas pòdon rencontrar de dificultats ligadas al temps o a la geografia per se conéisser entre eles. Aqueles rencontres prepausan de prene lo temps d’escambiar entre los diferents partenaris e d’enriquesir las practicas de cadun a partir de las volontats/possibilitats de totes. Nòstre desiri es que d’aqueles escambis nascan d’aisinas e de projèctes que valorizaràn e facilitaràn las practicas de totes / Informacions.
Animacions de sensibilizacion e de descoberta de la lenga
Passejadas contadas en occitan, conferéncias, concerts… dins lo cadre del festenal Quinzena occitana dins Òut-e-Garona. En 2025, la Quinzena s’interèssa a la tematica del conte, del 7 al 22 novembre 2025.
Aqueste festenal es bastit en partenariat amb d’associacions occitanas del territòri (Culturas d’òc, Oc-Bi 47, ATP Marmande, Agenés Tèrra Occitana, Revista òc, Per doman e de segur l’EOE-IEO47), amb l’ajuda del departament d’Olt e Garona e la region Navèra Aquitània.
Corses per adultes a Agen (47) a l’annada : existís mila e una bonas rasons d’aprene l’occitan… mas una sola basta ! Los aprenents venon per rasons diferentas : ajudar son mainatge escolarizat dins una escòla bilingua o immersiva, trobar un emplec ligat a l’occitan, connéisser mai la cultura de son païs, sas rasigas, comprene las originas dels noms de luòc, de familha, las paraulas dels artistes occitans e mai que mai lo PLASER ! Lo plaser d’aprene una lenga : cants, literatura, tradicion populara, provèrbis, istòria…
Un cors un còp per mes al 3 carrièra Joseph Bara a Agen. En 2025, los corses se faran lo dimars 28 de genièr, lo dimars 18 de febrièr, lo dimars 4 de mars, lo dimars 15 d’abril e lo dimars 20 de mai.
Adesion : 30€ puèi 3,50€ lo cors / Informacion : eoe@wanadoo.fr
· Animacions escolaras e extra-escolaras : sensibilizacion a la lenga gràcias a de talhièrs (fabricacion d’instruments de musica, jòcs de quilhas & palets, jòcs de societat en occitan, …).
· Formacion especifica :
– « Aquesir e desvolopar de competéncias e d’aisinas d’animacion en lenga e cultura occitanas », al torn d’una tematica (carnaval occitan, video, …) o al torn de moduls (contes, danças, cants, jornalisme, …).
– Estagi de cant tradicional occitan.
Per mai d’informacions, nos podem contactar sus eoe[at]wanadoo.fr o via nòstra pagina Facebook.
Còla violeta
L’Escòla Occitana d’Estiu, es un moment per faire societat a l’entorn de l’occitan lo temps d’una setmana.
Profeitam d’aquela escasença per se poder questionar, poder evoluir, poder crear e melhorar lo viure amassa per totas e totes. Fasèm partida d’una societat que fonciona amb mantunes sistèmas de dominacions e d’opressions sistemicas. Digús i escapa pas puèi qu’avèm creissut dins aquela societat, pasmens a l’EOE avèm enveja de viure amassa en ensajant de faire autrament, dins lo respècte de cadun•a, dins lo partatge e la benvolença. Sèm actritz e actors, responsablas personalament e collectivament.
L’associacion EOE a decidit i a tres ans de metre en plaça una còla violeta. Permet pendent l’annada de trabalhar e se formar sus aqueste subjècte en ligason amb lo Conselh d’Administracion e merce lo trabalh d’autras associacions. Permet tanben la creacion e traduccion d’aisinas en occitan que pel moment n’existisson pas gaire. Pendent l’EOE la còla es presenta per aculhir la paraula del mond se qualqu’un se sentís pas d’aise amb una situacion, se qualqu’un se questiona, o se qualqu’un vòl discutir de las discriminacions. Pòt tanben intervenir sus una situacion d’urgéncia per securizar l’espaci e prene en carga las victimas e los autors.
Dins l’encastre de las activitats de l’EOE demandam a totas e totes d’èsser conscient•as de las diferéncias entre lo monde e téner compte de las discriminacions qu’existisson per ensajar de las combatre. Desiram que lo monde se sentiscan plan e al mai i soscam dessús, nos formam, ne charram, al mai serà aisit de ba faire.
Per nos ajudar :
- S’informar e se formar
- Despassar sos estereotipes pròpris
- Desvolopar e encoratjar l’empatia
- Educar a la diversitat e a la toleréncia
- Pas acceptar las situacions de discriminacion
- Adoptar de formas d’adaptacions en foncion dels besonhs
Transformam aital l’EOE en un espaci de benvolença, d’equitat, d’egalitat e donc de libertat joiosa !
>>> Volètz ajudar l’EOE amb un don ?
Vòstra donacion nos ajudarà a far viure la lenga e la cultura occitanas. En mai, es avantatjosa : 60 % de vòstre don es deductible de las taxas (per las personas residentas en França).